ايا ليكم بعض مغامراتي مع القراية

مساء الخير اليوم حاب ندير موضوع خفيف برك
Light باه ما يطلعلكمش السكر بزاف

حابـ نهدرلكم برك على طريقتي في حل الامتحانات في مختلف الأطوار التعليمية لي عقبت عليهم
(على الأقل تستفادو انتم ثاني)
+
الطريقة راني جبت بيها نتائج جيدة و كنت من الأوائل
(عاند و ما تحسدش ههههههههههههههههه)

أنا مثلا في مادتي الفرنسية و الانجليزية Jamais قريت Sujet كامل نقرا غير السطور الأولين نعرف النص علاش يهدر و نبدا نحلـ بلا ما نقرا النصـ بصح في الآخر ندي علامات ملاح

في مادة الرياضيات (نكرهها) نبقا نكتب في الهيكل تاع الحل هكذا مثلا

حل الامتحان

حل التمرين الأول
1/ حساب المساحة

2/ حساب المحيط

حل التمرين الثاني

و هكذا

pAsque ما تعرفش الحل و نقول على الأقل نظم صفحة حتان يجيني الفرج من الكراسي المجاورة

________

أما في الفيزياء دائما ما نبدا الامتحان باحتجاج و تهديد بترك الورقة بيضاء
و قد فعلتها مرة أنني تركت الورقة بيضاء و دار كيفي الجميع في القسم
و عمرت شوي من اللي يقرو معايا باه نديرو اضراب و بالفعل درنا اضراب تاع القسم تاعنا Anglophone و رحنا للرقابة حيث قابلنا المراقب العام و قالنا شوفو تولو أقسامكم أو تكتبو كامل تعهد درنالو اعتصام جا داخل فينا ضرب ههههههه
______________
و قبل توزيع الأوراق نبدا ندعي في ربي ((يا ربي علابالي مانيش ملتزم و راني ما نستاهلش بصح و الله كون نخدم اليوم و الله نولي متدين و نخطي مشاكل و بنات و كلش)) بطبيعة الحالـ مع أن ينتهي الامتحانـ أنسى كل ما وعدت به خالقي !!!

______________

أما الفلسفة فمن كثرة نحب المادة من نهبط راسي نبدا نكتب و نتفلسف و نجيب من راسي
_____________

منـ أكثر موقف محرج تعرضت ليه في الامتحان أنني قطعت ورقة وسخ و كتبت فيها رقمي و رسالة صغيرة لواحد الفتاة تقرا معايا و رميت الورقة ليها ...شافني الحارس و قالي ضك تدي زيرو راك تنقل و كذا،،، و هو يهدر و يحل في الورقة حتى قرا المضمون ضحك و ردلي الورقة قالي بعد الامتحان و دبر راسك ضرك أقرا برك
______________________

أما نهار التربية اسلامية دخل صاحبي يدير Zoooom باه ينقل دخلنا عند واحد المكتبة تاع سلفي متدين قلنالو السلام عليكم قالنا و الورع و التقوى يقطرو من وجهو و عليكم السلام ورحمة الله تعالى و بركاته (جابهانا من قرن للقرن) ،،
المهم قلنالو الشيخ حابين نديرو زوم برك ايه قالنا بالطبع دقيقة برك دارنا الزوم هذا المتدين و المتخلق و رحنا شابعين على الضحك و قلنا عليه (واقيل راهو مداير لحية ذراع)
____________________________
خطرا واحدة الطفلة قاتلي عاوني في الأنجليزية و بطبيعة الحال كل شيء يهون في خاطر البنات...المهم دخلنا و طرحولنا السؤال وش هي ثاني أكبر دولة في افريقيا و هي قاعدة تعيطلي
و أنا ما لقيتش كيفاه ندور الحارس جا توالي و قعد ....سكت شويا و نضت نغني
Algerie Mon Amour Algerie pour toujours
الحارس ما فهم والو و قاعد يضحك و قالي واش طلعلك الغاز
و الطفلة ثاني فهمتني و كتبت الاجابة
______________________

مغامرات ما يخلاصوش

بصح المخيرا فيهم
نهار درتـ امتحان في الكيمياء و ديت معايا ورقة الحل للدار
نلقا بلي راني ديت معايا الورقة و ما عطيتهاش للاستاذ آآآه تخلعت
بصح قزدرت وجهي و رحت غدوا و قتلو أستاذ و الله عيب عليكم ما تهتموش بالتلاميذ هكذا
أستاذ جيت رايح نقرا نلقا تحت المكتب الورقة تاعي تاع الامتحان
واقيلا طاحت للحارس
مسكين علابالو صح و دا الوقة عادي

_______________

علابالي السكر طلعلكم 10 غرامات و نصكم جاتو سكتة دماغية بصح نورمال

ايا اليكم الخط بلا ما تنسو شوي تقييم الدعوة راهي تصفر
اخوكم ميمو

عدلتلك موضوعك باسكو اللون كان ما يبانش مليح
المهم انت يخي توجور مهبول في كلش و تزيد تقول كشما تدوا مني
ههههههههه مليح ليك غير التفلسيف هدا ماكان

السلام عليكم اخي ميمو كيما تدلع رويحتك هههههه
اي و الله غير السكر هبطلي باسكو علاش
راك وحدك خويا لعزيز شحال شابة الطريقة تاعك هههههههه بالتوفيق ي المسار التعليمي لينا اون جنرال